ليث الحريبة

قوم يا شايل حِملنا خلنا للخيمة نروح

ما دريت ابحال زينب دوبها تبچي و تنوح

---------------

قوم باوديك ليها يا شبل داحي الباب

لازمه باب المخيم واقفه ويا الرباب

آه ياويلي تنادي ما رجع ليث الحِراب

بو الفضل يا نور عيني وين من بعدك اروح

-----

منكسر ظهري يخوية من طحت فوق الصعيد

و دارت العسكر عليه عقب عينك يا عضيد

ليش نايم بالشريعة يا شهم وانا وحيد

قوم يا سردال حربي نومتك تشعب الروح

------

صاح يا مهجة الزهرا خلني عالشاطي طريح

للخيام اشلون ارجع وانظر اسكينة تصيح

ومقدر انظر للوديعة تندب ابقلبٍ جريح

ورقبته مالت ياويلي و فارقت منه الروح

------

و رجع للخيمة ينادي راح شيال العلم

و انكسر قلب الوديعة و نادته بلوعه و ألم

وين ياخوية كفيلي جاي وحدك للخيم

ليش ما جبته نشوفه قبل ما تطلع الروح

------

قال ليها يا وديعة آيسي بس ما يعود

عافنه يا نور عيني و استحب نوم اللحود

ابد ما يرجع يزينب طاح و اتمزق الجود

ذاب قلبي من نظرته عالثرى دامي الجروح

------

والطمت بالحال خدها والدمع منها يسيل

راح عباس الشفيه بعد ما عندي كفيل

ما بقى بالخيم واحد غير نسوان و عليل

و الشهيد حسين بعده يترك الخيمة و يروح

-------

ربيع الثاني 1441 ه - ديسمبر 2019 م