زينب تسأل السجاد

غايب وين يبن حسين

من وين يبني جيتك

شوف اشصار هالاطهار

ضجوا يبويه الغيبتك

..

يبكى ويحكى ومدمعه دم مذروف

وقلها يا عــــمه جيتي امن لطفوف

جسمه يا عـــــمه موزعينه بالسيوف

جم صواب قلبي ذاب

يا قلب ظل ابحسرتك

..
واريت جســـمه بالثرى بليا راس

راسه يا عـــمه حاجزينه الأرجاس

وش هالرزيه شيبت مني الراس

صكني البين فوق العين

ياياب ويلي الفجعتك

..

واريت عبدالله يعــــــــــمه بقبره

مثله بلايا راس وضــمه الصدره

ضهري انحنى وآنه أجر الحسره

آه يحسين ويني اوين

انسى يبويه ذبحتك

..

ولكـــبر دفنته يا حـــــزينه يمهم

وجملة ارجاله في حفيره كلهم

بلايا غسل امغسلين ابدمهم

صحت بصوت آه للموت

صارت بطيه جيتك

..
العريس جاسم في القبر نزلته

امجفن بثياب العـــــــرس عاينته

ويه بني هـــــاشم وافادي فته

شفت الشاب دمه خضاب

بن عمي حسره زفتك

..

العبـــــــــــــاس واريته يعمه وحده

ابعيده عنــــــهم يا مصونه لحده

تفطر دليلي وعفت عمري بعده

تاج الراس وافي الباس

يمه الشريعة روضتك

..

جت الحـــريم امروعه يمه تنوح

اتصيح يبن حسين مررت الروح

واريت أهلك يا عـــزيز المذبوح

قلبك ذاب راسك شاب

هاي الرزيه هدتك

..

2009 م / ذو القعدة 1430 ه