يوم عشرين صفر

زوارك لفت يحسين تلطم والقلب مالوم

يم قبرك تون وتصيح يوم الأربعين اليوم

..

طبت كربله يحسين يا ضنوة علي الكرار

حقك واجـــــب إعلينا نزورك يابو الأحـــــرار

جينه اليوم بنواسي أمك بضعة المختار

خلها ابقهر عدوانك نحيي الأربعين اليوم

..

نبيع الروح يالوالي من أجلك يمــــاي العين

لو منة تسيل دموم فدوة للعــــــــزيز حسين

بسمك يا ضوة العالم تصيح اليوم لمحبين

دمنه من اجل دمك خله يسيل هذا اليوم

..

هذا اليـــــــــــوم بنواسي أختك زيــــــــنب الحوره

وانواسي علي الســــــجاد منه الجبد مفطورة

قاسى الهضم من بعدك إمن الطاغية وجوره

ورد اليوم بحزانه وبخده الدمع مســــجوم

..

بدموم النحـــــر يحسين رفت راية الأســــــــلام

ودين المصطفى تعافى وطبت راية الظلام

جم ظالم هوى للقــــــاع واتكسر مثل لصنام

مثل ايزيد و أعــــــــــــوانه ماليهم أثـــــــر لليوم

..

وأنت من بعد ذبحك بالطف شعت أنوارك

صــــاير مقصد الزوار شــــــــــوف اليوم زوارك

ادق عالصدر والهـــــام وتصب دمع بجوارك

واطب حضرتك واتصيح ياويلي على المظلوم

..

مصابك يا أبو اليمه وسط قلوبنه يا حسين

طول الدهر خلانه نندب يا ضـــــــوة الكونين

نار الحــــــــزن بحشانه تتوقد يا نــــــــور العين

حتى يطلع القائم وياخذ ثارك مــــن القوم

..

وثار أختك المهضومه الراحت غصب للشام

فوق النـــــوق مسبية وياها حـــــــرم وأيتام

وبين أجناب دشــــــوها وليها تنظر الظلام

ظلت تحن يا ويلي وبخدها الدمع مسجوم

..

جينا اهنا نواسيها رغم أعداك رغم أعداك

ونجدد عهد هاليوم كــــــل أرواحنا تفداك

يانور القلب يحسين كلنا نهتدي بهداك

يا رافع لوا الإسلام دوم وياك يا مظلوم

..

نوفمبر 2013م / محرم 1435ه