حب الحسين عليه السلام

زينب في المعارة تحوم.. طايح وين يمظلوم

مهرك عود الصيوان.. خالي يخبر النسوان

ياويلي عليك اليوم

..
خويه حسين حاجيني وقلي ياكتر مطروح

في الحومة أدور وين طايح يا عديل الروح

ليكون السهم صابك خوية والقلب مجروح

ولاحت جثته ليها جت وشافته مذبوح

ياويلي يبو اليمه ظلت تنتحب يمه

لوعني الدهر هاليوم

..

خوية ما أظن ترضى إختك مالها والي

وين أروح من بعدك ياويلي على حالي

أبقة محيره وأصيح وبخدي الدمع هالي

وهاي الحرم والأيتام كلها تصرخ إقبالي

قلبي ممتلي بجروح ياويلي على المذبوح

ماعندي أحد هاليوم

..

وجاليها الشمر بالسوط ولوعها على المتنين

خلي حسين يازينب لازم في الأسر تمشين

ماعندج بعد والي فوق القاع مذبوحين

هذا اليوم يازينب نادي باسم من تردين

باعذب أنا حالج يزينب حتى أطفالج

بتشوفين هذا اليوم

..

جاوبها من المنحر خليني على التربان

وردي باري العيلة عليكم تهجم العدوان

هذا اليوم يازينب لعدة تحرق الصيوان

ماعندهم حمية ودين يا خية بني سفيان

باري خيه أيتامي ليهم مابقى حامي

يا زينب هذا اليوم

..

ردت للخيم وتصيح عني وين يا زهرة

زينب مالها والي تندب والقلب جمرة

ليتج تنظري حالي وحال حسين عالغبرة

شمر الرجس حز راسه وخلاني أجر حسرة

يابنت النبي المختار بينه خانت الأشرار

محتارة أني هاليوم

..

محتارة وأدير العين وإيدي لازمة أفادي

مصاب حسين خلاني انسى حتى أولادي

وهاي الخيل حاطتنه عليه سدت الوادي

وغير الحزن ماعندي وينه غوث المنادي

في وينه فحل لرجال عني يصد هالأنذال

ماعندي أحد هاليوم

..

ولنه بصوت ناداها أدري والقلب موجوع

مصاب حسين يا زينب نساني كسر لضلوع

وصلني خبر عنكم حسين بكربلة مصروع

وإنتي يا نظر عيني محتارة وتهلي دموع

من بعد العزيز حسين ظليتي بليه معين

الله يساعدج هاليوم

..

وصاحت آه يايمه علينه دارت الأيام

وعندي حرم مرتاعة ويمي تصارخ الايتام

وعلي السجاد ذوبني يندب آه بالآلام

بعد حسين والعباس صرنه بولية الأزلام

ياويلي على حالي بالطف راحت إرجالي

يازهرة هذا اليوم

..

2012 / ذو الحجة 1433