Embedded Files
سامحني يخويه حسين بنمشي وما دفناكم
عنكم بالضعن باشيل وروحي تبقى وياكم
********************
في الحادي عشر عاشور مرت شافت إخوتها
على التربان بدماها بلا تجهيز عافتها
والحادي حدى بيها زينب جيف حالتها
تصيح بصوت متألم بنمشي الله وياكم
********************
بنمشي ومالنه والي ماندري القصد لاوين
ريت تشوف حالتنه فوق الهزل مسبيين
حرم وأيتام تتصارخ وتتلفت شمال يمين
بلجت واحد يجيها واخلصها من أعداكم
********************
وصدت صوب لمسناة ونادت يا قمر هاشم
ماتنهض تشوف إختك أسيرة قادها غاشم
خويه ما أضن ترضه أمشي بوليه الظالم
وآني من وطن جدي بكفاله جيت وياكم
********************
ورمله تصيح يا جاسم يا عريس أراضي الطف
أمك سلبوها القوم وتتستر براح الكف
بروح بذلتي يبني وقلبي عليك يتلهف
لأقضي هالعمر كله طول اليوم أنعاكم
********************
وليلى تصيح يالأكبر يا شبه النبي الهادي
أتوعى وشوف حال أمك سلبوا ارداي يسنادي
شمر وزجر لمجرمين وبيها قطعوا الوادي
لكبر يابعد عيني ينمشي الله وياكم
********************
وسكنه تصيح خلوني يم جثه أبوي حسين
ما أقدر على فراقه بظل وياه يا مسلمين
لو أسباع هذا البر تاكلني وأموت الحين
خلوني أضل يمة روحوا والله وياكم
********************
وعبدالله الطفل أمه اتسايل والدمع غدران
وين الطفل خبروني رميتونه يهالعدوان
أريد آودعه واروح دلوني القلب وجعان
وردت تسأل الحادي طفلي شفاعل وياكم
********************
والسجاد جر ونه سمعها إتحاجي الحادي
ندا ياعزيزة المظلوم سكتي ذايب إفادي
هذا العدو ما يرحم وآنه مغلول بأقيادي
صبروا عالهظم والضيم رب الكون يرعاكم
********************
خادم أهل البيت (ع)
الحاج يعقوب القصاب
نوفمبر 2007/ ذو القعدة 1428هـ
(الجزء الثاني – ص 76)
Page updated
Google Sites
Report abuse