عرس المنيه

رمله اتصيح يا جاسم  وين أهلك يشوفونك

يا ريت الحسن حاضر يمسح دمعة اعيونك

ماظنيت هذا اليوم  بأرض الطف يزفونك

في الحومة بعد ساعة  بدم نحرك يخضبونك

آه عليك ياوليدي  اظنك رايح من أيدي

جاسم يا ضوة عيوني

.......

انت منيتي وسلواي  العرسك أعد الأيام

لاكن حسبتي ضاعت  ومني تبددت الأحلام

حسبت حساب أتهنى  بعرسك يا بدر الخيام

يا بني ذاب دلالي  يا شبل الحسن جسام

عرسك دون خلانك  إثياب العرس أكفانك

جاسم يا ضوة عيوني

.......

زفه بلا شمع وإنثار  ماشفنه قبل هاليوم

يتيم وتكسر الخاطر  غارق في بحر الهموم

اسمع عمك اينادي  عليه اتجمعت هالقوم

حاير بين عدوانه  وطير البين ظل يحوم

شلون اليوم اتهنى  وين الشمع والحنه

جاسم يا ضوة عيوني

........

وين الأهل يوليدي  زفة كلها نسوان

حريم أتصيح مرعوبة  وضجة وسطة الصيوان

أجساد مطرحة يمها  وتصرخ آه يا شبان

وعمك راحت أنصاره  حاير بين هالعدوان

وين عمك العباس  والأكبر شديد الباس

جاسم يا ضوة عيوني

......

خل العرس يا عريس  واسمعني يا بعد أمك

قوم بعجل يا وليدي  واتوسل لعند عمك

منه إطلب الرخصة  خله ينفرج همك

هذا العرس ماريده  يا عمي وحق أمك

روحي ملت الدنيا  وقلبي اشتاق للجنه

جاسم يا ضوة عيوني

......

حياتك بيعها للدين  وإنصر عمك المظلوم

جاهد دون والينا  ويشلك بالعمر هاليوم

اتوكل على الباري  ومثل عودك المسموم

أريدك يا بعد أهلي  أراك امخضب ابلدموم

فدوى للوحيد حسين  الحق خوتك الطيبين

جاسم يا ضوة عيوني

2009م / شوال 1430 ه