نعي ... نعي ...

مرّت اعلى الجمل زينب والولي ابدمّه غسيل

تصيح خويه وداعة الله هالظعن عزّم يشيل

---------

ماشيه من كربلا ياحسين دنظر حالتي

بولية العدوان يبن أمي بروح بذلّتي

من بعد عبّاس ذخري زجر قايد ناقتي

والشّمر ورّم امتوني وآنه حرمة بلا كفيل

---------

وعندي نسوان ويتامى فوق نوق مهزّله

تصيح مرعوبة ياخويه والمدامع تهمله

هذي تطلب ستر ليها وخايفة من حرملة

من يباريها بسفرها دوبوني من العويل

---------

وهذي اتقلّي يزينب من لنا ابطول الدّرب

تخفي اللّوعة بصدرها وخوف عندها تنضرب

شلون حالة هالودايع ماشية وين الغرب

مالها والي ياخويه غير ابنك هالعليل

--------

باجر انوصّل الكوفه نصير فرجة للملا

كلمن ينادي علينا جوا سبايا كريلا

وأنا اللي نزلت بيها ابظل علي عقد الولا

وذكر أيام المعزّه في حمى حامي الدّخيل

-------

وتالي ادخلها أسيره مقيّدة مثل العبيد

وانتوا يااخواني ضحايا بكربلا فوق الصّعيد

أجسامكم ظلّت رميّة مقطّعة منها الوريد

بحرّة الرّمضا ذبايح والدّما منكم تسيل

-------

وين حيدر مايراني مسلّبه ودمعي يسيل

(الجزء 1 – ص 66)