جيناكم يبو اليمه

أصيح بلا ولي ظلت أختكم 

ومن الشام رديت بحرمكم

..

خويه من الأسر ردينه ها اليوم 

اندق الصـــدر والقــــــلب مالوم

قـــــبرك ويــــن خبرني يمظلوم 

جيـــــت الكربلا ويــــه حــــرمكم

..

ماتقعد يخويه أحجي ويـــــاك 

عفتوني وحيده بولية اعداك

ذاب القـــــــلب من حنة يتاماك 

من يوم الذي حرقو خيمكم

..

إلمن أشتكي يحسين حــــــالي 

حرمه مـــــــدلله مـــــن غير والي

راحـــــت أخوتي وراحــــــت إرجالي 

دمعي ما نشف من رحت عنكم

..

من وصــــــل ضعنا بلدة الشام 

كلهم باالفرح طلعوا يضرغام

سووا عيـــــد يا خـــــويه الظلام 

وراسك عالرمح يبرى ضعنكم

..

عتبي عالدهر ها لخـــــــان بيه 

من بعد الخدر أمشي سبيه

لأرض الشام للطاغي هديه 

و أدخل مجلسه ها اللي ذبحكم

..

وبين أجنــــاب خــــويه وقفوني 

وبليا ستـــــــــر يا نـــــــــور عيني

وبني سفيان كلهم ينظروني 

ويمي تصيح يا خويه حرمكم

..

 بأرض الشام قاسيت المصايب 

تنظر خيتك خـــــويه الأجــــــــانب

وجيت لكربله والــــــراس شايب 

أنظــــر حالتي خــــــويه بعدكم

..

وتاليها بخرابه ياضوه العــــــــين 

جت الناس تتفرج الصتـــــــــوبين

قلبي منشطر يا خوية شطرين 

من نـــوح اليتامى وي حـــرمكم

..

علينه عيدت يحسين لنذال 

شافوني أسيره ومالي رجال

ألطم هامتي والدمع همال 

وبحبال الأسر جروا أختكم

..

وعلي السجاد ذوبني ونينه 

كل ساعة يون ويدير عينه

وينادي يعمه حسين وينه 

وما واحد لفى يحسين منكم

..

قلبي ممتلي يا خويه بجروح 

ماريد العمر بعدك يمذبوح

أتمنى يخويه راحــــــــت الروح 

ولا للشام سافرت بحرمكم

..

ليت بكربله خلــــــــصت أيامي 

خويه هالسفر نحل اعظامي

وحق راسك ياها المذبوح ضامي 

وين آروح يا خويه بعدكم

..

قبر عباس وينه خبروني 

ماشوف الدرب عميت عيوني

بقله القوم بعده مارعوني 

وبسوط الشمر ألم أختكم

..

أكتوبر 2015م / محرم 1437ه