مصرع علي الأكبر

ليله يم جسد لكبر              تصيح وتلطم الخدين

يبني ذوبت جبدي              وخليت القلب نصين

آني أمك يا بعد الروح                 حاجيني يا شبل حسين

يالكبر فتح اعيونك            وانظرني يانور العين

وقلي من طبر راسك          ابسيفه وخمد انفاسك

ومنهو اللي سلب طاسك               لكبر يانظر عيني

—–**—–**—–**—–

يا شبه النبي المختار           انظر حالتي يمك

يلب احشاي جاوبني           مو آني الحنونة أمك

اصب الدمع يوليدي           وغسل بالدمع دمك

روحي يالولد بتروح           جم صواب في جسمك

يبني ذاب دلالي                اشوفك قلي اشحالي

ذبيح امدد إقبالي               لكبر يانظر عيني

—–**—–**—–**—–

اشكد القلب يتحمل             واشوفك عالثرى مطروح

تون ونات تبهضني           من كثرت ألم الجروح

مقدر احبس ادموعي          جاوبني يابعد الروح

أنينك ذوب افادي              وروحي من الجسد بتروح

ابقلبي نار تتوقد               ياشبه النبي أحمد

جسمك عالثرى امدد           لكبر يانظر عيني

—–**—–**—–**—–

صاح احسين ياليلي           كثر البجي مايفيدج

انا قلبي مثل قلبج              متقطع على وليدج

هذا اليوم ياليلي                لكبر رايح من أيدج

ويش بيدي يامحزونه          ونتي بعد ويشب يدج

هذا الزمن دولبني              ابسهم البين صوبني

امصاب الولد دوبني           لكبر يا نظر عيني

—–**—–**—–**—–

لكبر غمضت عينه            وليله جالسه يمه

وظلت تصفك اجفين           مات ابني يبو اليمه

وحسين ارتفع صوته          وزينب جاته ابهمه

وشافت للعزيز ينوح          متخوصر على جسمه

وزادت صيحت النسوان              تندب وسطت الصيوان

على خدها الدمع غدران               لكبر يانظر عيني

—–**—–**—–**—–

زينب لفت يم حسين           وبخدها الدمع مسجوم

أدري مصيبتك صعبه                 بيك الخلف يا مظلوم

الله يعين دلالك                بمصاب الولد هاليوم

خويا تكسر الخاطر            صرت محتار وسط القوم

قلبي ممتلي ابلجروح          مثلك ياعزيز الروح

لكبر عنه وين اروح           لكبر يا نظر عيني

—–**—–**—–**—–

وتممدد على طوله             وضع خده على خده

وصاح بصوت يازينب               ماريد العمر بعده

على الدنيا العفى يختي                كد خاطري فقده

علينا نصبي الماتم             بموت اليوم انا عنده

وضع صدره على صدره             ولكبر شابح بنظره

مات وصاح يا حسره                 لكبر يانظر عيني

—–**—–**—–**—–

خادم أهل البيت “ع”

الحاج يعقوب القصاب

ذو القعدة 1430هـ/ 2009م

(الجزء الثاني – ص 53)