أم الخدر

زينب عودت واتصيح وينه حسينا الغالي

خويه ليش عفتوني حرمه وما الها والي

*************

طبت كربلا هاليوم تشكي حالها لحسين

عنك سافرت للشام ودموعي على الخدين

فوق الهزل مسبيه وستري راحة الچفين

يا تاج الخدر يحسين ترضى ما إلي والي

*************

خويه من بعد خدري أروح ميسره للشام

في وينه هلي راحوا صرت ابولية الظَلام

ترضى يا بعد روحي من بعد الخدر أنضام

ذابت مهجتي يحسين ما واحد رحم حالي

*************

من بعد البطل عباس شمر الرجس لي حادي

ما چنه بنات أشراف وجدنا أحمد الهادي

من ديره إلى ديره بينا يقطع الوادي

وطول الدرب يضربني ويشمت ما إلك والي

*************

عزي من علي الكرار وأدخل في وسط ديوان

وبليا ستر يحسين تنظر حالتي العدوان

وذاك الرجس اذاني ابسوطه يضرب النسوان

وكل ساعه يناديني وينه سورك العالي

*************

وجيت اليوم بآلامي بنصب لك عزا هاليوم

خلوني أحن وأصيح ياويلي على المظلوم

نار الحزن چاويني في وسط القلب مضروم

هالسفره يانور العين منها ذاب دلالي

*************

ونادت ياعلي السجاد يم القبر وديني

قضيت أيام سهرانه وما تشوف الدرب عيني

وديني لقبر حسين نار الشوق چاويني

راحت والقلب دامي تندب آه يا الوالي

*************

وامتدت على طوله ونادت يا بعدهالروح

جيتك يا ضوا اعيوني وبخدي الدمع مسفوح

قبلك ليت ذبحوني ياللي اعلى الثرى مذبوح

دسمع ضجة عيالك كلها تندب قبالي

**************

ياهو اللي يرجعني خويه عند وطن جدي

أختك حايره يحسين ماواحد بقى عندي

بس ابنك علي السجاد وناتة فرت چبدي

واصيحن آه يا ويلي بالطف راحت ارجالي

***************

ودارت عينها وتصيح دقعد يا قمر هاشم

بسك نوم يا عباس بعدك عالنهر نايم

انهض قوم رجعني الأكبر راح والجاسم

وماعندي أحد ياحيد هذا اليوم يبرى لي

**************

الحاج يعقوب القصاب

شوال 1441 ه

يونيو 2020 م