Embedded Files
يبني نشطر دلالي
من أنظر للمهد خالي
اصيح بصوت يا يمه
عني راح عبدالله
..
شنهي جرمتك يبني
امن الماي يحرمونك
وبصدر العزيز حسين
إبسهم الغدر يرمونك
ماضنيت هذا اليوم
برض الطف يذبحونك
ماراعوا النبي جدك
ولا بصغرك يرحمونك
اشعنده حرمله وياك
تشرب من نجيع دماك
هالطاغي جرح قلبي
عني راح عبدالله
..
دبحوه العده ضامي
ومنه القلب شب نيران
ماعندهم أبد رحمه
ولا رأفه بني سفيان
قساوة هالعده عندهم
أتعدوا على الرضعان
بسهم البين ترمونه
هذا اليوم يا عدوان
المن أشتكي حالي
حرموني من الغالي
خلوني أجر حسره
عني راح عبدالله
..
رايح يطلب اميه
ورد لي بالسهم مدبوح
جابه حسين لمخيم
وبخده الدمع مسفوح
على وليده يجر حسره
يبجي والقلب مجروح
وشحال الذي تنظر
ولدها عالثرى مطروح
اصوابك صاب دلالي
وبعدك خابت آمالي
بس النوح والحسرة
عني راح عبدالله
..
قلبي شلون يتحمل
وليدي بالسهم منصاب
رفعت الصوت بآلامي
وضجت بالبجي لطناب
طفلي راح من إيدي
وعلى راسي نعب لغراب
باجر بالحشر عندي
يا حرمله وياك احساب
خلاني اطيل النوح
وبخدي الدمع مسفوح
ماعندي ولد غيره
عني راح عبدالله
....
من شفت الولد مجروح
ودمه يسفح إقبالي
صحت بصوت يا ويلي
آه عليك يالغالي
سهم اللي قطع نحرك
يبني قطع دلالي
الدنيه مظلمه بعيني
حين إتكور إهلالي
انت سلوتي و مناي
عبدالله يالب حشاي
ماعندي ولد بعدك
عني راح عبدالله
...
ليت الكربله ماجيت
ولا أنظر يالولد يومك
من عندي خطفك البين
وبقيت أقاسي اهمومك
جرحك في وسط قلبي
طول العمر ورسومك
من شفتك على التربان
مزجت الدمع بدمومك
بعدك لقضي اسنيني
انوح عليك ياعيني
ولجلك بنصب الماتم
عني راح عبدالله
..
نوفمبر 2010 / ذو القعدة 1431 ه
Page updated
Google Sites
Report abuse